Lalpianfela Chawngthu chuan, ZPM sorkar hian SIA Exemption diklo takin an kal pui thu sawiin, RFCTLARR Act, 2013 hnuaiah Social Impact Assessment (SIA) awltir tur chuan India Parliament pawmpuina a ngai a, chu chu Appropriate Government (Central Govt) thuneihna a ni. Mahse, ZPM Sorkar chuan Mizoram Revenue Minister approval chauh hmangin Dan kalhin exemption a pe a. Hearing of Objection (Section 15) bawhchhiatna a ni. 

RFCLRR Act, 2013 section 15 hnuaiah hian ram lak/hralh a nih dawnin Collector chuan Rule 6 of ‘The Right to Fair Compensation and Transparency in Land Acquisition, Rehabilitation and Resettlement (Compensation, Rehabilitation and Resettlement and Development Plan) Rules, 2015’ in a sawi angin Hriattirna/Notice Form III hmangin a tichhuak tur a ni a. He Land Acquisition chungchanga remtihlohna/dodalna neite chuan Preliminary Notification tihchhuah atanga ni 60 chhungin ziakin an remtihlohna hi an thehlut tur a ni. Dodal an awm chuan Collector hian ngun takin a ngaithlain hearing te pawh a nei tur a nih laiin hei hi tih a ni lo a ni a. A copy hmuh tur pawh a la awm lo. Hei vang hian Lengpui mipuite tan pawh hriat ngaihna a awm lo. Preliminary Notification-ah khan section 15 hi sawilan niin ni 60 chhungin tih turah ni 15 chhungin tih a ni a, hei hi a dik lo hulhual bawk a ni, a ti.

" ZPM hian Notice to interested person an bawhchhiat nasat thu sawi leh in. He dan sawi ang hi chuan Collector-in a website-ah leh hmun remchang ram lak turah emaw, a bulah emaw public notice a tar chhuak tur a ni a. Ram lak tur chungchanga hamthatna emaw hlawkna emaw nei zawng zawngte chu public notice a tarna hun leh hmunah public notice chhuah atanga ni 30 aia tawilo leh thla 6 aia rei lo chhungin Collector hmaah an inlan tur a ni a. Pu Lalduhoma leh a Adviser-ten helai thu Zonet kaltlanga an sawi pawh kha an sawi dik lo niin a lang. Preliminary Notification-ah khan section 15 sawi lan a ni a, section 21 hi sawi lan a awm lo a, section 21 hnuaia public notice hi hmuh tur a awm lo bawk niin a lang. MNF Sorkarin NOC a pe tih hi ZPM hian an sawi teh chawk a, Lengpui ram an hralhna tur atana an Dan hman RFCLRR Act, 2013 hnuaiah hian NOC sorkarin a pek tur ziahna a awm lo a, he Dan hi MNF hian a hmang hman lo bawk a. NOC hi ZPM Sorkar hnuaiah ni 29/4/2024 khan ADC/RO counter sign thlap a awm thung a ni," a ti bawk.

MNF Legal Board Vice Chairman chuan, Section 12 in a sawi anga Preliminary survey of land tih a ni lo bawk a. Thil thleng ngai lo leh pawi em em ta chu, ram Ṭin 105 chuang hmun acquire tur a ni a, chu acquisition atana assessment zawng zawng ti zo vek tur chuan ni 15 chauh Aizawl DC hun pek a ni hi a ni. Hei hi May ni 15, 2025 a Preliminary Notification-ah khan chiang takin a inziak kuau a ni. MNF hian khulai ram khu ram ruak, thlaler ramro mai mai (barren land) an ti min ti a. Hei hi a dik lo an ti a nih chuan an dan hman RFCLRR Act, 2013 section 12 angin land survey an ti tur a ni a. A dik lo an tih chuan an siamṭha mai tur a ni. Mahse, ZPM Sorkarin Preliminary Notification an chhuahah hian Lengpui ram chu barren land/thlaler ramro a nih avang leh ram buai a nih loh vangin Social Impact Assessment/Resettlement tih ngai lo a ni tih an ziak kuau mai bawk a ni. April ni 17, 2025 a ZPM Sorkarin Notification a chhuah khan MNF sorkar laia inbiakna leh indawrna lo awm tawh zawng zawng kha awmze nei lo, a bul ṭan ṭhat leh ngaiin a siam a. Chuvangin, anmahni leh anmahni an inpuang mualpho vel mai mai a ni, a ti.

"Crop Value leh Structure Value te chhutchhuah/assess a ni lo bawk a, Lengpui ramah khuan Land Value chauh assess a ni. Zonet palaiin a zuk tlawhna video te kha lo en chuan a dinna hnung maiah khan gate ṭha tak te, In dinglai te a awm a. Mahse khang value te kha assess a ni miah lo bawk. ZPM Sorkarin an Preliminary Notification chhuahah thlaler ramro/barren land an tih miau avangin. RFCLRR Act, 2013 hnuaiah Dan ang thlapa Lengpui ram barren land/thlaler ramroa puangtu chu ZPM Sorkar hi a ni. ZPM Sorkar hian May ni 27, 2025 khan RFCLRR Act, 2013 hnuaia buildings, crops & plants hlutna chhut dan tur Notification a tichhuak thlap a. Amaherawhchu, a zawm chuang lo a ni," MNF General Secretary ni bawk chuan a ti.

MNF Legal Board Vice Chairman chuan, he ram laknaah hian interest chhut dan a dik lo nasa hle a, Section 30(3) an bawhchhia a ni. Revenue Minister, ZPM Media Cell Chairman khan January ni 31, 2026 a Aizawl Press Club-a Press Meet a neih ṭum khan, “Preliminary Notification chhuah ni Ni 15-5-2025 atanga chhiara ni 62-na ah Revenue Dept. chuan Final Land Acquisition Notification a. Ni 62 chhung vel interest chhut tur a nih laiin kum khat lawih atan interest chhut a ni a. Lengpui bikah khan an ram lak pumpui atana ni 70 interest tur chu Rs. 1,97,07,393.73 (Cheng vaibelchhe khat nuai sawmkua pasarih sangsarih zathum sawkua leh pathum) a nih laiin ZPM sorkar-in interest a approve zat chu Rs. 10,27,59,981.60 (Cheng vaibelchhe sawm, nuai sawmhnih pasarih sing nga, sangkua zakua sawmriat pakhat) lai a ni. Dan pela ZMP sorkarin interest a pek zat chu Rs. 8,30,52,587.85 (Cheng nuai zariat sawmthum sing nga sang hnih zanga sawmriat leh pasarih) lawih a ni a ti.

Tunhma zawng khan DC office te hian dik taka interest chhut dan an thiam em em ṭhin a, ZPM sorkar hnuaia an thiam ta lo thut mai hi a mak em em a ni. Tih fuh tawk loh awm palh a nih pawhin DC office-in draft award an thehluh hnuah sorkarin a dik leh dik loh a lo enfiah tur a ni a. Mahse, sorkar hian a dik leh dik loh a en lo nge, an pawm hmiah mai hi kan rama thil thleng lo tura kan duhthusam leh vawiin thlenga min la barakhaihtu a ni a, ‘Tunge a tui hang hawp” tih hi MNF chuan hriat kan duh a, CBI-in an chhui ngei theih nan CVO ah representation kan thehlut ta a ni. He thilah hian kan Revenue Minister leh kan CM te hian hre lo chunga an tisual a nih chuan an fimkhur tawk lo hle a, hetiang sum lian tham bothlau tur pawh veng thiam lo Chief Minister leh Revenue Minister neih hi kan ram hian a mamawh lo. Chuvangin, an mawhphurhna an hlen chhuak zo lo tih inpawm se, bang ngam law law mai se kan ram tan chuan a ṭha ber ang, a ti.

He ramah hian Land Scam lian tham tak, dan leh hrai pawisa miah lova kalpui a ni hi Mizoram tana zahthlak kan ti a. ZPM Sorkar hian "Burma Sipai Sorkar" ang maiin dan an duh duh hunah an pawt kawi a ni. Tun hnuah hetiang hi thleng tawh suh se, a ti bawk.

"ZPM Sorkar hi heng zawhna hi kan zawt a ni. (1) Lengpui ram hi RFCTLARR Act, 2013 hmanga hralh a nih si chuan MNF hunlai khan he Dan Mizoram Assembly-in a adopt-na resolution mipuiah an pho chhuak thei em? (2) RFCTLARR Act, 2013 hnuaiah MNF khan Lengpui ram Land Acquisition atan Preliminary Notification an tihchhuahna copy min pe thei em? (3) RFCTLARR Act, 2013 hnuaiah Lengpui ram atan SIA Study tihna document min pe thei em? (4) Engvangin nge compensation award a tlem zawkna tur MLARR Act, 2016 High Court-in a paih khan Supreme Court-ah ZPM hi an zualko zui loh? (5) ZPM Sorkar hian eng vangin nge Lengpui ram hralhna hi mi pahnih te lak turin a ṭhen hran? (6) Pu Lalduhoma khan UNNATI Scheme hnuaiah loan la ang khan a insawi niin kan lo hre bawk a. Cheng Vbc 15 loan hi eng Bank berin nge pe? A loan document hi mipuiah a pho chhuak ngam em? Thla khata he loan rulhna tur hi a lo berah cheng nuai 10 vel zat zat a ngai dawn tihna a nih hmel a. Khawi pawisain nge a rulh dawn? (7) General Operational Guidelines for Submission and Processing of Claims under UNNATI Scheme, 2024 a lang lem lo Tourism Dept. hian engvangin nge kan CM hi consent an lo pek ve ringawt nachhan? (8) Fake Account hmanga mi bei ṭhina a puh David Sailo leh Tv. U Hranga te pawh man chhuak chat chat thei CM hian engvangin nge vawiin thlengin nasa taka Eiru-a puhtu Pu Zodintluanga leh Pu John Rotluangliana te, chhui chhuah chawp pawh ngai lo te hi a la man ve ngam loh? (9) Sihhmui chungchang leh Dawrpui JAC chungchanga puhnaah CM hian party rawn lova Criminal Complaint a thehluh mai laiin eng vangin nge Lengpui ram hralnaah hian Party thu thu a tih bik? (10) CBI ten dik leh langtlang taka Lengpui ram hralh chungchang an chhui theih nan CM leh Revenue Minster-te hi an bang ngam dawn em? tihte hi kan zawt a ni, a ti.

ZPM sorkar hian an duh chinah Dan an bih a. An sawichhuah leh duh dan a dik ṭhin silova. Thu belhchian dawl lovin mipui rilru hruaikawi an tum fo a ni, a ti bawk.